Sunder Chary
మహబూబ్‌నగర్ అక్టోబర్ 08 ( కలం పవర్ న్యూస్ బ్యూరో ): పాలమూరు గడ్డపై జాతీయ స్థాయి బాక్సింగ్ పోటీల సందడి నెలకొంది. జిల్లా కేంద్రంలోని జేపీఎన్సీ ఇంజనీరింగ్ కళాశాలలో నాలుగు రోజుల పాటు నిర్వహించనున్న జాతీయ స్థాయి బాక్సింగ్ ఛాంపియన్‌షిప్ పోటీలు గురువారం ఘనంగా ప్రారంభమయ్యాయి. రాష్ట్ర ప్రభుత్వ విప్, మహబూబ్‌నగర్ ఎమ్మెల్యే యెన్నం శ్రీనివాస్ రెడ్డి, మహబూబ్‌నగర్ ఎంపీ డీకే అరుణ కలిసి పోటీలను ప్రారంభించారు. దేశంలోని 24 రాష్ట్రాల నుంచి 250 మంది బాక్సర్లు ఈ పోటీలకు హాజరై తమ ప్రతిభను చాటేందుకు సిద్ధమయ్యారు.
క్రీడా స్ఫూర్తే ముఖ్యం: యెన్నం
ఈ సందర్భంగా ప్రభుత్వ విప్ యెన్నం శ్రీనివాస్ రెడ్డి మాట్లాడుతూ.. క్రీడల్లో గెలుపోటముల కంటే క్రీడా స్ఫూర్తిని ప్రదర్శించడమే అత్యంత ముఖ్యమని అన్నారు. బాక్సింగ్ ఎంతో కఠినమైన క్రీడ అని, శారీరక దారుఢ్యంతో పాటు అపారమైన మానసిక స్థైర్యం, క్రమశిక్షణ అవసరమని పేర్కొన్నారు. క్రీడాకారులు ఓటమిని కూడా ఒక పాఠంగా తీసుకుని మరింత పట్టుదలతో ముందుకు సాగాలని సూచించారు. తెలంగాణ ప్రభుత్వం క్రీడారంగానికి పెద్దపీట వేస్తూ క్రీడాకారులకు అవసరమైన సౌకర్యాలు కల్పిస్తోందని తెలిపారు. జాతీయ స్థాయి పోటీల్లో పాల్గొంటున్న 250 మంది బాక్సర్లు తమ ప్రతిభను చాటుకుని భవిష్యత్తులో అంతర్జాతీయ వేదికలపై దేశ కీర్తి ప్రతిష్ఠలను ఇనుమడింపజేయాలని ఆకాంక్షించారు. పోటీల నిర్వాహకులకు, క్రీడాకారులకు యెన్నం శ్రీనివాస్ రెడ్డి శుభాకాంక్షలు తెలిపారు.
యువత క్రీడల్లో రాణించాలి: డీకే అరుణ
ఎంపీ డీకే అరుణ మాట్లాడుతూ మహబూబ్‌నగర్ గడ్డపై ఇలాంటి ప్రతిష్ఠాత్మక జాతీయ స్థాయి బాక్సింగ్ పోటీలు జరగడం శుభపరిణామమని అన్నారు. ఇలాంటి జాతీయ స్థాయి టోర్నమెంట్ల ద్వారా స్థానిక యువతకు క్రీడలపై ఆసక్తి పెరగడంతో పాటు, జాతీయ స్థాయి క్రీడాకారుల ప్రతిభను ప్రత్యక్షంగా చూసే అవకాశం లభిస్తుందని పేర్కొన్నారు. మహబూబ్‌నగర్ యువత ఈ అవకాశాన్ని స్ఫూర్తిగా తీసుకుని క్రీడల్లో రాణించాలని ఆమె పిలుపునిచ్చారు.
జాతీయ పతాక ఆవిష్కరణ.. రింగ్‌లో పంచ్‌లతో ప్రారంభం
పోటీల ప్రారంభానికి ముందు అతిథులు జాతీయ పతాకంతో పాటు బాక్సింగ్ ఫెడరేషన్ జెండాను ఆవిష్కరించారు. అనంతరం క్రీడాకారుల నుంచి గౌరవ వందనం స్వీకరించారు. ఆ తర్వాత బాక్సింగ్ రింగ్‌లో పంచ్‌లు వేసి జాతీయ స్థాయి పోటీలను లాంఛనంగా ప్రారంభించారు. దీంతో జేపీఎన్సీ ప్రాంగణం క్రీడా సందడితో మార్మోగింది. దేశంలోని వివిధ రాష్ట్రాల నుంచి వచ్చిన బాక్సర్లు పోటీల్లో తమ ప్రతిభను ప్రదర్శించేందుకు సిద్ధమయ్యారు. నాలుగు రోజుల పాటు జరిగే ఈ పోటీల్లో హోరాహోరీ పోరు సాగనుంది. ఈ కార్యక్రమంలో జాతీయ బాక్సింగ్ అసోసియేషన్ కార్యదర్శి రాకేశ్ భరద్వాజ్, తెలంగాణ రాష్ట్ర కార్యదర్శి రఘువీర్ సింగ్, జిల్లా ఒలింపిక్ సంఘం అధ్యక్షుడు ఎన్పీ వెంకటేశ్, జేపీఎన్సీ చైర్మన్ కేఎస్ రవికుమార్, మహబూబ్‌నగర్ మండల సర్పంచుల సంఘం అధ్యక్షుడు రాజు గౌడ్, కళాశాల అధ్యాపకులు, క్రీడాకారులు, క్రీడాభిమానులు పెద్ద సంఖ్యలో పాల్గొన్నారు.
