గౌడ్ సాబ్ పట్టాలు ఇచ్చినా... రెడ్డి గారు తాళాలు ఇస్తలేడు..!? - జర్నలిస్టుల ‘సొంతింటి కల’కు అధికారుల ఫుల్‌స్టాప్ ఎప్పుడు.! - ఇళ్లు సిద్ధం... లబ్ధిదారులు సిద్ధం... మరి పంపిణీకి అడ్డంకి ఎవరు..?

మహబూబ్‌నగర్, అక్టోబర్ 7 ( కలం పవర్ న్యూస్ బ్యూరో ): “ఇల్లు కట్టించి తాళం వేస్తే అది ఇల్లు కాదు... ప్రభుత్వ కార్యాలయంలో ఫైలు అయితే అది అంతులేని కథ!” జర్నలిస్టుల ఇళ్ల సమస్యను చూస్తుంటే ప్రస్తుతం ఇదే సామెత గుర్తుకు వస్తోంది. సంవత్సరాలు గడిచాయి... ప్రభుత్వాలు మారాయి... అధికారులు మారారు... పాలకులు మారారు... కానీ జర్నలిస్టుల ఇళ్ల సమస్య మాత్రం “ఎక్కడ వేసిన గొంగళి అక్కడే” అన్న చందంగా ఉండిపోయింది. ఒకప్పుడు పట్టాలు ఇచ్చారు. ఆ తర్వాత ఇళ్ల నిర్మాణం జరిగింది. లబ్ధిదారులు కూడా సిద్ధంగా ఉన్నారు. కానీ తాళాలు మాత్రం ఎప్పుడు చేతికి వస్తాయో చెప్పేవారు లేరు! ఇది ఇల్లు పంపిణీ వ్యవహారమా? లేక “ఫైలు ఎక్కడుందో వెతుకు” అనే ప్రభుత్వ స్థాయి ఆటా? అన్న సందేహం జర్నలిస్టుల్లో వ్యక్తమవుతోంది.

ప్రజల సమస్యలు రాసే వారికి... తమ సమస్య మాత్రం ఎవరు రాస్తారు.?

   ప్రజలకు ఇళ్లు లేవంటే వార్త రాసేది జర్నలిస్టే. రోడ్లు బాగోలేవంటే ప్రశ్నించేది జర్నలిస్టే. అధికారులు స్పందించడం లేదంటే నిలదీసేది జర్నలిస్టే. పేదలకు న్యాయం జరగడం లేదంటే గొంతెత్తేది జర్నలిస్టే. కానీ జర్నలిస్టుల ఇళ్ల సమస్య వస్తే మాత్రం... ఫైళ్లకు ‘మౌనం’ ఎందుకు..? ఇదే ఇప్పుడు అసలు ప్రశ్న. “అద్దంలో ముఖం కనిపించకుండా దుమ్ము ఉందని అద్దాన్నే నిందించినట్లు”, ప్రజల సమస్యలను వెలుగులోకి తెచ్చే జర్నలిస్టుల సమస్యలను కూడా సంవత్సరాల తరబడి పెండింగ్‌లో ఉంచడం ఎంతవరకు సమంజసం?

30 ఏళ్ల సేవకు 30 ఏళ్ల నిరీక్షణేనా?

   మూడు దశాబ్దాలుగా జర్నలిజం వృత్తిలో ఉన్న కొంతమంది జర్నలిస్టులకు ఇప్పటికీ సొంత ఇల్లు లేకపోవడం పరిస్థితి తీవ్రతను చెబుతోంది. ఇంటి కోసం పోరాడిన జర్నలిస్టులు వృద్ధులయ్యారు...పిల్లలు పెద్దయ్యారు...ప్రభుత్వాలు మారాయి...కానీ ఫైలు మాత్రం యవ్వనంగానే ఉంది! ఇంతకాలం ఒక ఫైలు కదలకపోతే దానికి చక్రాలు అవసరమా? లేక “శుభ ముహూర్తం” కోసం ఎదురుచూస్తుందా.? అని జర్నలిస్టులు ప్రశ్నిస్తున్నారు.

‘ప్రజాపాలన’లో జర్నలిస్టుల పాలిట మాత్రం ఎందుకీ నిరీక్షణ?         

     ప్రజాపాలన... ప్రజా సంక్షేమం... పారదర్శక పాలన... అంటూ నిత్యం ప్రసంగాలు వినిపిస్తున్నాయి. అయితే ప్రజల తరఫున ప్రశ్నించే జర్నలిస్టులు తమ ఇళ్ల కోసం ప్రశ్నిస్తే మాత్రం “ఫైలు పరిశీలనలో ఉంది”, “ప్రభుత్వం దృష్టికి తీసుకెళ్తాం”, “త్వరలో చర్యలు” అనే పాత డైలాగులే ఎందుకు.? “రేపు” అనే మాటకు ప్రభుత్వ ఫైళ్లలో ఎంత పొడవైన క్యాలెండర్ ఉందో జర్నలిస్టులకు అర్థం కావడం లేదు!

ఇళ్లు ఉన్నా... ఇళ్లలో జర్నలిస్టులు లేరు..!

    నిర్మాణం పూర్తయిన ఇళ్లను లబ్ధిదారులకు అప్పగించకుండా ఉంచడం వెనుక అసలు కారణమేంటి?నిధుల సమస్యా? పరిపాలనా సమస్యా? సాంకేతిక సమస్యా? లేదా నిర్ణయం తీసుకునే చిత్తశుద్ధి సమస్యా?

ప్రభుత్వం స్పష్టంగా చెప్పాలి..

   ఎందుకంటే “పాలు పొంగిపోతే పొయ్యి మీద పడతాయి... సమస్యలు పొంగిపోతే ప్రజలు రోడ్డుపైకి వస్తారు.” ఇప్పుడు జర్నలిస్టులు కూడా రోడ్డుపైకి వస్తున్నారు.

పాలమూరు నుంచి ప్రజాభవన్‌కు... అడుగులు కాదు, ప్రశ్నలు.!

   తెలంగాణ వర్కింగ్ జర్నలిస్ట్ ఫెడరేషన్ రాష్ట్ర ఉపాధ్యక్షులు బండి విజయ్ కుమార్ ఆధ్వర్యంలో అక్టోబర్ 10న చేపట్టనున్న “పాలమూరు టు ప్రజాభవన్” పాదయాత్ర కేవలం కొన్ని కిలోమీటర్ల ప్రయాణం కాదు. అది సంవత్సరాలుగా పెండింగ్‌లో ఉన్న ప్రశ్నలకు సమాధానం కోరే ప్రయాణం. “పట్టాలు ఇచ్చిన ప్రభుత్వం... తాళాలు ఎప్పుడు ఇస్తుంది?” “ఇళ్లు నిర్మించిన అధికారులు... పంపిణీ చేయడానికి ఎందుకు వెనుకడుగు వేస్తున్నారు..?” “ఏళ్లుగా సేవ చేస్తున్న జర్నలిస్టులకు సొంతింటి హక్కు ఎప్పుడు లభిస్తుంది?” ఈ ప్రశ్నలకు సమాధానం చెప్పాల్సింది ఇప్పుడు ప్రభుత్వమే. ఉమ్మడి మహబూబ్‌నగర్ జిల్లాలోని జర్నలిస్టులు పెద్ద సంఖ్యలో తరలిరానున్న నేపథ్యంలో, అక్టోబర్ 10న పాలమూరు నుంచి బయలుదేరే ప్రతి అడుగు ఒక ప్రశ్నగా... ప్రతి నినాదం ఒక డిమాండ్‌గా... ప్రతి అడుగు ప్రభుత్వ తలుపు తట్టే శబ్దంగా మారే అవకాశం ఉంది. ప్రజలకు ఇళ్లు ఇవ్వాలని వార్త రాసే జర్నలిస్టులకు ఇళ్లు ఇవ్వడానికి మాత్రం ప్రభుత్వం వార్త కోసం ఎదురు చూడకూడదు!ఎందుకంటే... “ఇల్లు కట్టినవాడికి తాళం ఇవ్వాలి... పట్టా ఇచ్చినవాడికి హక్కు ఇవ్వాలి...సేవ చేసినవాడికి గౌరవం ఇవ్వాలి...లేకపోతే ప్రజల ప్రశ్నలకు సమాధానం చెప్పాలి!”

జర్నలిస్టుల ఇళ్ల సమస్యపై ఇక “కాలయాపన”కు కాలం చెల్లిందా?లేక మరోసారి “త్వరలో... త్వరలో...” అంటూ ఫైళ్లను నిద్రపుచ్చుతారా?

అక్టోబర్ 10న పాలమూరు నుంచి ప్రజాభవన్ దారి ఈ ప్రశ్నకు సమాధానం కోరబోతోంది...